Xəbər 7, 05 iyul 2010
Əl-Cəzirə televiziyasının internet saytında Saleh Sunusi imzası ilə nəşr olunan yazıda Türkiyədə “istiqamət dəyişməsi”nin yaşanmadığı ifadə edilərkən bölgənin “Osmanlı dövlətinin nəvələrini təkrar gözlədiyi” vurğusu edildi. Liviyada müəllim olan Sunusi yazısını belə açıqladı: “Türkiyədə bir “istiqamət dəyişməsi” yoxdur, Türkiyənin bölgədəki rolu daha təsirli hala gəlmişdir. Bəziləri bu rolun Türkiyəyə buraxılmasından narahatlıq hissi keçirib Türkiyənin ərəblərə və İrana yaxınlaşdığını söyləyir. Türkiyə bu ölkələrlə əsrlərdir əlaqədədir. Türkiyə tarixi təcrübəsi ilə bacarıqlı bir ölkədir; nəyin yaxşı, nəyin pis olduğunu çox yaxşı bilir. Türkiyə yenidən tarixi təcrübəsi ilə şərqə, qərbə, cənuba, şimala diplomatik həmlələrlə açılmaq istəyir.” Əsrlərdir kasıb müsəlman Afrika ölkələrinin yeraltı və yerüstü sərvətlərinin qərblilər tərəfindən istismar edildiyi ifadə edilən yazıda “Bölgə xalqı Osmanlı dövlətinin nəvələrinin təkrar bölgəyə gələrək onları müstəmləkə dövlətlərinin əlindən qurtaracağına inanır” deyilir. “Türklər Çaldıran döyüşü ilə Şərq, Orta şərq və Afrikanın müəyyən bölgələrini öz idarələri altına alaraq buralara hüzur, güvən və rifah gətirmişlər” yazılan məqalədə“Türklər fəth etdikləri yerlərdəki yeraltı və yerüstü sərvətlərə toxunmamışlar, əksinə, bu bölgələrdə ciddi mənada abadlıq fəaliyyətləri aparmışlar” ifadələrinə yer verilib. Türklər fəth etdikləri yerlərə istismar etmək məqsədi ilə girmədiyi üçün xalqlar tərəfindən qəbul gördüyü qeyd olunan yazıda “Afrikada, Orta şərqdə və Şərqdəki xalqlar türklərin təkrar bu bölgələrə dönmələrini arzu edir” qeyd olunub. |
