Quranda həyatın hər bir anında, hər bir kiçik və böyük hadisədə Allahla sıx əlaqədə olmağa və daim axirəti xatırlamağa əsaslanan iman anlayışı göstərilir. Quranda həmçinin peyğəmbərlərdən misal gətirildiyi zaman bir çox yerdə onların hər zaman Allaha sığınan və axirəti xatırlayan insanlar olduqlarından bəhs edilir. Əhəmiyyətli və fövqəladə hadisələrdə, eləcə dəyalnız çətinliklərlə üzləşdikdə və ya sıxıntıya düşdükdə Allahı və axirəti xatırlayıb, gündəlik həyatda qarşdığı hadisələrdə isə qəflət içində olmaq kimi bir anlayış Quran əxlaqına tamamilə ziddir. Möminin hər anı, hər bir halı, etdiyi hər bir iş başına gələn hər bir hadisə onun Allaha yaxınlaşması, əxlaqını gözəlləşdirməsi, savabını artırması üçün verilmiş fürsətdir. Quranda bir möminin həyatının hər anında bunu necə edəcəyi ilə bağlı bir çox misal verilmişdir. Bunlardan biri də möminlərin evə daxil olarkən salam verərək gözəl əxlaq nümayiş etdirməsidir:
«...Evlərə daxil olduğunuz zaman bir-birinizi Allah dərgahından bərəkət və xoşluq diləyən bir salamla salamlayın. Allah ayələri sizə belə izah edir ki, düşünüb daşınasınız!» («Nur» surəsi, 61)
Rəbbimiz möminlərə evlərə girdikləri zaman salam vermələrini, ancaq bunu edərkən imanlı, gözəl, Qurana və dinə uyğun yaşamaq diləyi ilə salam verməyə niyyət etmələrinin lazım olduğunu xatırlatmışdır. Buna görə də, salamın niyyətinə diqqət etmək də çox vacibdir.
Möminlər bir- biriləri ilə qarşılaşdıqda Uca Allahdan rəhmət və əmin-amanlıq diləyərlər. Ona salam verən insanın kim olduğundan asılı olmayaraq, salamı alar və ona daha gözəl bir şəkildə qarşılıq verərlər. Möminin bu davranışı Quran əxlaqının insanlar arasındakı sosial münasibətlərə gətirdiyi gözəlliklərdən biridir. Salam ilə bir-birini tanımayan insanlar arasında mehribanlıq, isti münasibət və yaxınlıq yaranır. Bu əxlaqın yaşanması ilə cahil cəmiyyətdə yaşanılan gərginlik, hörmət və sevginin olmadığı mühitlər Müsəlmanların olduğu yerlərdə heç bir şəkildə meydana gəlməz.
Ayədə bildirildiyi kimi düşünülsə və həmin sözün mənasına diqqət edilsə, verilən salamla bunlar gerçəkləşmiş olur. Ən əsası Allahın ayə ilə fərz qıldığı bir hökm yerinə yetirilmiş olur. Bununla yanaşı, Allahın sülh və əmin-amanlıq mənasını verən «Salam» adı xatırlanır. Möminlər belə bir vasitə ilə tez-tez bir-birinə ən gözəl arzularını çatdırıb, qarşılıqlı sevgi və bağlılıqlarını möhkəmləndirirlər. Beləliklə Allahı xatırlayır və cənnət davranışı olan salamlaşma ilə axirəti intizarla gözləmələrini ifadə edirlər. «Salam» sözü möminlərin arasında olan etimad, inam və əmin-amanlığın bir ifadəsidir.
