Жыйынтык

Эч күмөнсүз, дүйнөдө бир адамдын жаратылганынан жана Жаратуучусун таанышынан маанилүүрөөк эч нерсе жок. Китеп бою ар адам үчүн өмүрдө эң маанилүү болгон мына ушуну түшүндүрүүгө аракет кылдык.

Китеп бою көргөнүбүздөй, Аллахтын бар экени бүт далилдери менен апачык көрүнүп турат. Себеби ааламдагы жана жандыктардагы аң-сезимдүү долбоорлор жогорку бир аң-сезимдин натыйжасында гана пайда болушу мүмкүн. Бул апачык, анык жана талашсыз бир чындык.

Болгондо да, бул чындык сиз үчүн бүт өмүрүңүздөгү эң маанилүү нерсе. Балким буга ушул күнгө чейин анчалык маани бербей, ал тургай, бул жөнүндө өтө аз ойлонгон болушуңуз мүмкүн. Бирок, ишенип коюңуз, сизди жараткан Аллахты таануу башка бүт нерседен бир топ маанилүү жана зарыл.

Анын сизге бергендерин бир ойлоп көрүңүз; өмүр сүрө алышыңыз үчүн атайын жаратылган, бүт детальдары менен өтө кылдат пландалган бир дүйнөдө жашап жатасыз. Бул дүйнөгө келүү үчүн жана бул системаны жасоо үчүн эч нерсе кылган жоксуз; сиз буга эч кандай салым кошкон жоксуз. Болгону бир күнү көзүңүздү ачып, сансыз немат-жакшылык ичинде болуп калдыңыз. Көрө аласыз, уга аласыз, сезе аласыз...

Булардын баарынын себеби болсо – Анын сизди ушундай кылып жаратышы. Бир аятта мындай деп айтылат:

Аллах силерди энелериңердин курсагынан эчтеке билбеген абалда чыгарды жана шүгүр кылаарсыңар деп угуу, көрүү (сезимдерин) жана көңүлдөрдү берди. (Нахл Сүрөсү, 78)

Куранда айтылгандай, адамдагы бүт нерсени ага тартуулаган жана ичинде жашап жаткан бүт ааламды жараткан бир гана Аллах.

Демек адамдын милдети – бул анын жана бүт нерсенин Жаратуучусу болгон Аллахты таануу жана Ага шүгүр кылуу.