1. "Шәфкатьле, рәхимле Аллаһ исеме белән...  Күкләрдә һәм җирдә нәрсә бар икән, алар Аллаһка тәсбих әйтәләр. Падишаһлык — Аныкы, мактау да Аңа гына, һәм Ул — һәрнәрсәгә кодрәтледер."

2. "Ул— сезне юктан бар итеп яратучы. Сезнең арагызда кәфер булучы да бар, мөэмин булучы да бардыр. Һәм Аллаһ сезнең кылганыгызны күреп торадыр."

3. "Хаклык илә күкләрне һәм җирне яратты һәм сезгә кыяфәт бирде, һәм кыяфәтләрегезне тагын да матурлатты-яхшыртты. Һәм Аңа кире кайту булачак."

4. "Күкләрдә һәм җирдә булган һәрнәрсәне белеп торучы, сезнең яшергән серләрегезне һәм ачыктан кылган эшләрегезне дә беләдер. Аллаһ күкрәк түрләрендә булганны да беләдер."

5. "Элек кәферлек кылганнар турында сезгә хәбәр килеп җитмәдемени? Алар эшләренә карата җәза татыдылар, һәм аларга— үзәк өзгеч газаптыр!"

6. "Бу — үзләренә ап-ачык дәлилләр белән килгән пәйгамбәрләрдән: «Безне тугры юлга күндерүче — кешеләр арасыннан булырлармыни?» — дип сораганнары өчен, ышанмаганнары өчен һәм дә йөзләрен борган өчен булыр. Аллаһ исә мохтаҗ булмады. Аллаһ бай, мактаулы бит!"

7. "Кәферләр аларны беркайчан да терелтмәячәкләренә инаналар. Әйтче: «Киресенчә, Раббым илә ант итәмен, сез терелтеләчәксез дә, моннан соң исә кылган гамәлләрегез турында үзегезгә хәбәр бирерләр. Бу — Аллаһка җиңел бит!"

8. "Иман китереп Аллаһка, пәйгамбәренә һәм Без иңдергән нурга инаныгызчы! Аллаһ — кыла торган нәрсәләрегез турында хәбәрдар!"

9. "Җыелу көнендә сезне Ул бергә җыяр, бу көн —  бер-береңне алдау көне. Кем булса да Аллаһка инанды һәм дә яхшы гамәлләр кылды ки, Ул аның начар эшләрен гафу итәр, мәңгелеккә калдырыр өчен  асларында агым сулар агып тора торган бакчаларга кертәчәк. Менә шул — бөек җиңүдер!"

10. Инкарь итүчеләр һәм аятьләребезне ялганга   чыгаручылар исә җәһәннәм әһелләредер. Анда алар мәңгегә калачаклар. Һәм ахырлары никадәр начардыр!

11. "Аллаһның рөхсәтеннән башка һичбер бәла каза булмас. Кем исә Аллаһка инанса, Аллаһ аның  кальбен тугры юлга юнәлдерер, һәм Аллаһ — һәрнәрсә турында белүчедер."

12. "Аллаһка һәм рәсүлгә итагать кылыгызчы! Әгәр исә йөзләрегезне борып куйсагыз, рәсүл өстендә ап-ачык җиткерү генәдер!"

13. "Аллаһ, Аннан башка һичбер иләһ юктыр. Мөэминнәр исә Аллаһка гына тәвәккәлләсеннәр."

14. "Ий, иман китереп инанучылар! Хатыннарыгыз  вә бала-чагаларыгыз арасында сезгә дошманнар да бардыр. Алардан сакланыгызчы! Әгәр исә аларны  гафу итсәгез, кызгансагыз һәм жәлләсәгез, Аллаһ кичерүче, рәхимле бит!"

15. "Хаклыкта, малларыгыз һәм балаларыгыз — сезнең өчен имтихандыр. Бөек әҗер исә Аллаһта."

16. "Хәлегездән килгәнчә Аллаһтан куркыгыз,  тыңлагыз, итагать кылыгыз вә үзегезгә хәерлелек  өчен өлеш чыгарып торыгыз! Кем исә үзенең саранлыгыннан котылса, уңышка ирешүчеләрдән булучы! "

17. "Әгәр Аллаһка яхшы бурыч бирсәгез, Ул сезгә  аны кат-кат арттырып кайтарыр һәм үзегезне кичерер. Һәм Аллаһ — шөкер итүче, хуш күңелле,"

18. "күренми торганны һәм эчкәре булганнарны  белүче, гыйззәт һәм хикмәт ияседер."