1. "Шәфкатьле, рәхимле Аллаһ исеме белән...  Күкләрдә һәм җирдә булучылар Аллаһны мактыйлар. Ул — бөек, хикмәт ияседер."

2. "Ий, иман китереп инанучылар! Ни өчен сез кылмаганыгызны әйтәсез соң? "

3. Сезнең кылмаганыгызны әйтүегездән Аллаһның нәфрәте олы була.

4. "Хакыйкатьтә, Аллаһ, үз юлында нык итеп төзелгән бинага охшаш булып, саф-саф торып сугышучыларны сөядер."

5. "Менә Муса үз кавеменә: «Ий, кавемем!» — дип әйтте. «Мин сезләргә Аллаһның рәсүле булганны белә торып, ни өчен мине җәфа чиктерәсез?» Тайпылдылар исә Аллаһ аларның йөрәкләрен тайпылдырды. Аллаһ азгыннарның кавемен тугры юлдан алып бармый бит!"

6. "Һәм менә Гыйсә, Мәрйәм углы әйтте: «Ий, Исраил уллары! Хакыйкатьтә, мин сезгә Аллаһның рәсүледер, миңа кадәр Тәүратта иңдерелгәннең хаклыгын раслаучы һәм миннән соң киләчәк рәсүл турында хуш хәбәрне җиткерүчедер. Аның исеме — Әхмәд». Инде ул ачык билгеләр белән аларга килеп җиткәч, алар: «Бу— ачыктан-ачык сихер»,— дип әйттеләр."

7. Үзен исламга өндәгәндә Аллаһка яла якканнан да кем гөнаһлырак булыр икән? Аллаһ тугры юлга гөнаһлыларны күндермәячәк.

8. "Алар Аллаһның нурын авызлары белән сүндерергә маташалар! Ничек кенә кәферләр күрә алмасалар да, Аллаһ — үз нурын мөкәммәл кылучы."

9. "Ул башка диннән өстен булдырыр өчен үз рәсүлен тугры юлга җитәкчелек һәм хакыйкый дин белән җибәрүче, хәтта мөшрикләр күрә алмасалар да."

10. "Ий, иман китереп инанучылар! Үзегезне үзәк өзгеч газаптан саклап калырдай сәүдәне күрсәтеп бирергәме соң?"

11. "Ул сәүдә — сезләрнең Аллаһ һәм Аның рәсүленә иман китереп инанудан, малларыгыз һәм җаннарыгыз белән Аллаһ юлында көрәшүдәндер. Бу сезнең өчен хәерлерәк, әгәр белсәгез иде!"

12. "Ул сезгә гөнаһларыгызны гафу итәр һәм үзегезне астында сулар агып торган бакчаларга кертәчәк, һәм Гаден җәннәтләрендә булучы хуш урыннарга урнаштырыр. Менә нәрсә ул — бөек уңыш!"

13. Сез яратканның башкасы исә — Аллаһның ярдәме һәм якын булучы җиңү! Шатландырчы мөэминнәрне!

14. "Ий, иман китереп инанучылар! Нәкъ Гыйсә Мәрйәм углы хәвариларга: «Аллаһка кайсыларыгыз минем ярдәмче?» — дип әйткән шикелле Аллаһка ярдәмчеләре булыгызчы! Хәварилар исә: «Без Аллаһка ярдәмчеләрдер»,— дип әйттеләр, Исраил улларының бер өлеше иман китереп инандылар, башка өлеше исә ышанмады. Без инанучыларга дошманнарына каршы көч бирдек, һәм алар өстен чыктылар."