1. "Шәфкатьле, рәхимле Аллаһ исеме белән... Тур тавы белән ант итәм,"

2. "һәм язып куелган китап белән,"

3. җәелгән төргәктәге.

4. "Һәм зиярәт ителә торган өй белән,"

5. "һәм күтәрелгән түбә белән ант итәм,"

6. һәм тутырылган диңгез белән дә.

7. "Хакыйкатьтә, Раббыгыз газабы булачак,"

8. аны кире кайтаручы нәрсә юктыр.

9. "Күк селкенү белән селкенгән көнне,"

10. һәм таулар кузгалып йөри башлаганда —

11. ул көнне ялганга чыгаручыларга кайгы булсын!

12. Алар сулыкта булып уйнап яталар!

13. Ул көнне алар җәһәннәм утына этеп төшерелерләр.

14. Менә шушы инде сез ялганга чыгарган ут!

15. Сихерме бу? Әллә сез күрмисезме?

16. "Яныгыз шунда! Түзсәгез дә, түзмәсәгез дә сезнең өчен барыбер. Сез кылганыгызга карата гына җәза аласыз!"

17. "Тәкъвалык ияләре, хакыйкатьтә, бакчалар арасында һәм рәхәтлектә,"

18. "үзләренә Раббылары китереп биргәннән ләззәтләнеп, һәм аларны Раббылары тәмуг газабыннан саклаганга шатланалар!"

19. Кылган гамәлегез өчен исәнлектә-саулыкта ашагыз һәм эчегез.

20. Саф-саф тезелгән түшәкләрдә кырын ятып! Һәм Без аларны кап-кара зур күзлеләргә өйләндерәбез.

21. Иман китереп инанганнар һәм иманда аларга ияргән токымнарны исә... Без аларга үз токымнарын китерербез һәм аларның эшләреннән һич бернәрсәне дә киметмәбез. Һәр кеше үзе кәсеп иткәненең тоткыныдыр.

22. Без аларга җиләк-җимештән һәм иттән теләгәннәрен мул итеп тәэмин итәрбез.

23. "Алар анда бер-берсенә касә бирешерләр, ләгу дә булмас анда һәм гөнаһка бирелү дә юк."

24. "Һәм алар тирәсендә, нәкъ кузгатылмаган мәрҗән кебек, яшь егетләр йөреп торалар."

25. "Һәм бер-берсенә, сорашып, мөрәҗәгать итәрләр."

26. "Алар әйтер: «Без элек әһелебез турында кайгырткан идек,"

27. һәм Аллаһ безгә шәфкатьлелек кылды һәм безне утлы давыл газабыннан коткарды.

28. "Без элек Аңа дога илә ялварган идек, хакыйкатьтә, Ул — илтифатлы, рәхимле!»"

29. "Исләренә төшер, син бит Раббыңның нигъмәте белән багучы да түгел, мәҗнүн дә түгелсең."

30. "Яки алар: «Шагыйрь — ул, тәкъдире үзгәргәнгә кадәр көтик әле!» — дип әйтерләр."

31. «Көтегез әле! Сезнең белән мин дә көтеп торырмын!» — дип әйт.

32. Әллә аларга моны төшләре боерамы? Әллә алар тыңламыйча буйсынмаган кавемме?

33. "Яки алар: «Ул аны үзе уйлап чыгарды», — дип әйтерләр. Юк! Алар иман китереп инанмыйлар!"

34. "Әгәр алар хак сөйли торган булсалар, шуңа охшаш риваять китереп бирсеннәр әле!"

35. "Яки алар юк нәрсәдән барлыкка яратылганнармы, яки алар үзләре барлыкка китерүчеләрме?"

36. Әллә алар күкләрне һәм җирне яраттылармы? Юк! Алар инанмыйлар!

37. "Яки Раббыңның хәзинәләре алардамы, яки алар хөкем сөрүчеләрме?"

38. Яки астыртын тыңлар өчен аларның баскычлары бармы? Тыңлаучы ачык дәлил китереп бирсен әле!

39. "Әллә аның кыз балалары булып, сездә ир балалармы?"

40. "Яки син алардан түләм әҗерен сорыйсыңмы, алар исә авыр бурычка чумганнар?"

41. "Яки аларның гаиб-яшерен нәрсәләре бармы, һәм алар язып баралармы?"

42. Әллә алар хәйлә коралармы? Кәфер булучылар исә үзләре хәйләгә эләгүчеләр бит!

43. Яки аларның Аллаһтан башка икенче иләһләре бармы? Алар кушып сөйләгәннән... Аллаһка дан!

44. "Әгәр алар күктән кисәкләр барып төшкәнен күрсәләр: «Куерган, өелеп куйган болытлар», — дип әйтерләр."

45. Яшен белән һәлак ителәчәк көннәрен очратканга кадәр калдырып тор син аларны!

46. "Ул көнне аларның хәйләләре һичнәрсәдән коткармас, һәм аларга ярдәм дә ителмәячәк."

47. "Һәм, хакыйкатьтә, золым кылучыларга моннан башка да газап булыр, ләкин аларның күбесе белми әле!"

48. "Раббыңның хөкемен сабыр итеп көт! Син, хакыйкатьтә, Безнең карамагыбызда бит! Аягүрә торган вакытта Раббыңны мактап тәсбих әйт!"

49. "Һәм төнлә, һәм йолдызлар баткан вакытта да Аңа тәсбих әйтче!"