1. "Шәфкатьле, рәхимле Аллаһ исеме белән... Хакыйкатьтә, Без сиңа ачык җиңүне ачып хөкем иттек,"

2. "синең гөнаһларыңның элегрәк тә, ахырдан да кылынганнарын Аллаһ ярлыкасын өчен, һәм сиңа Үз нигъмәтен тәмам итсен өчен, һәм сине туры юлга күндерсен өчен."

3. Һәм сиңа Аллаһ гыйззәтле ярдәм белән ярдәм итсен өчен дә.

4. "Ул — иман китереп инанганнарның кальб-күңелләренә иманнарына иманны арттырсыннар өчен тынычлык салучы. Күкләр һәм җир гаскәриләре — Аллаһныкы. Аллаһ — белүче, хикмәт иясе,"

5. "иман китереп инанган ирләрне һәм иман китереп инанган хатыннарны астында елгалар агып торган бакчаларга, анда мәңге калырга, Ул кертеп җибәрсен өчен һәм аларның начарлыкларын бетерсен өчен. Бу— Аллаһ каршысында бөек өлеш."

6. "Һәм Аллаһ турында явыз уй уйлаган, монафикъ ирләрне һәм монафикъ хатыннарны, мөшрик ирләрне һәм мөшрик хатыннарны Ул газапласын өчен. Алар өстенә — яман борылыш. Аларга Аллаһ ачуланды, һәм аларны ләгънәтләде, һәм аларга җәһәннәм хәзерләп куйды. Бу бик яман кайту урыны бит!"

7. "Күкләр һәм җир гаскәриләре Аллаһныкы һәм Аллаһ — гыйззәт, хикмәт иясе!"

8. "Без аны шаһит итеп, сөенеч хәбәрчесе һәм үгетләүче итеп җибәрдек,"

9. "сез Аллаһка һәм Аның рәсүленә иман китереп инансын, аңа ярдәм итсен өчен, һәм Аны олыласын, һәм иртә-кичен Аңа тәсбих әйтсеннәр өчен."

10. "Сиңа ант китергәннәр, хаклыкта, Аллаһка ант китерүчеләрдер. Аллаһның хөкеме — аларның куллары өстендә. Берәү исә антын бозса, хаклыкта, үзенә каршы бозадыр. Аллаһка биргән вәгъдәсен үтәүчегә исә Ул бөек әҗер бирәчәк!"

11. "Бәдәви гарәпләрнең артта калганнары сиңа: «Безне малларыбыз һәм әһелләребез мәшгуль иттеләр. Безнең өчен дә ярлыкау сора әле!» — дип әйтерләр. Алар кальб-күңелләрендә булмаганны телләре белән сөйлиләр. «Әгәр Ул сезгә зарар яки файда теләсә, Аллаһка каршы кемнең сезгә ярдәм итәргә көче бар икән?» — дип әйт. Әйе! Аллаһ — сезнең кылган гамәлләрегездән хәбәрдар."

12. "Әйе, сез бит рәсүл дә, иман китереп инанганнар да һич вакытта әһелләренә кире әйләнеп кайтмас дип уйладыгыз. Һәм сезнең кальб-күңелләрегездә бу бизәкләнгән булып күренде, һәм сез уйның начарын уйладыгыз, һәм һәлак булучы кавем булдыгыз."

13. "Кем исә Аллаһка һәм Аның рәсүленә иман китермәгән... хакыйкатьтә, Без кәферләргә ныклы ут хәзерләп куйдык."

14. "Күкләрдә һәм җирдә падишаһлык— Аллаһныкы. Ул кемне тели — шуны кичерә һәм кемне тели — шуны газаплый. Аллаһ — ярлыкаучы, рәхимле!"

15. "Сез сугыш малыннан аны алырга дип кузгалганда, артта калганнар: «Калдырыгыз безне! Без сезгә иярәчәкбез!» — диделәр. Алар Аллаһ сүзен алыштырырга маташалар! Әйт: «Сез безгә һич иярмәссез! Шулай итеп  сезгә моңа кадәр Аллаһ әйткән иде!» Алар: «Юк, сез бездән көнләшәсез!» Юк, алар азын гына аңлыйлар!"

16. "Артта калган бәдәви гарәпләргә: «Сез зур гайрәт иясе булган кавемгә каршы чакырылырсыз. Алар белән сугышырсыз, яки алар баш иярләр. Һәм әгәр сез буйсынсагыз, Аллаһ сезгә яхшы әҗер бирер, моңа кадәр йөз борган шикелле йөзләрегезне борсагыз, ул сезне үзәк өзгеч газап белән газаплар», — дип әйт."

17. "Сукыр өстендә дә гөнаһ юк, аксак өстендә дә  гөнаһ юк һәм авыру өстендә дә гөнаһ юк. Аллаһка һәм Аның рәсүленә итагатьле булганны Ул астында елгалар агып торган бакчаларга кертер. Кем исә йөз борса, Ул аны үзәк өзгеч газап белән газаплар."

18. "Сиңа агач астында ант китергәндә иман китереп инанучылар белән Аллаһ разый булды, һәм аларның кальб-күңелләрендә булганны Ул белде һәм аларга күңел тынычлыгын иңдерде һәм аларны якын җиңү белән саваплады,"

19. "Һәм алар алачак күп сугыш малы белән дә. Аллаһ — гыйззәт, хикмәт иясе!"

20. "Сезгә Аллаһ сез алачак күп сугыш малын вәгъдә итте, моны Ул сезгә ашыктырды һәм сездән кешеләрнең кулларын тотып калды, һәм мөэминнәргә аять булсын дип һәм сезне тугры юл белән алып барыр өчен."

21. "Башкасына сезнең көчегез җитмәде һәм Аллаһ аны чолгап алды, һәм Аллаһ һәрнәрсәгә кодрәтле бит!"

22. "Әгәр кәфер булучылар сезнең белән сугышса, алар, әлбәттә, артларына борылырлар иде һәм аннан соң алар яклаучы да, ярдәмче дә тапмаслар,"

23. "Аллаһның үткәндәге күрсәтмәсе буенча, һәм Аллаһның күрсәтмәсендә син һич үзгәреш тапмассың!"

24. Ул — алар өстеннән сезгә җиңү биргәч — аларның кулларын сездән тотып калучы һәм сезнең кулларыгызны алардан Мәккә үзәнендә тотып калучыдыр. Сез кылганны Аллаһ күреп тора!

25. "Алар — кәфер булучылар һәм сезне изге мәчеттән читләштерүчеләр һәм корбанлыкларны урынына җитешмәсен дип тотып торучылар. Әгәр сез белмәгән иман китереп инанучы ирләр белән хатыннар булмаса иде һәм аларны сез аудара алган булсагыз... хәтта сезгә белемсез гөнаһ тигән булыр иде... Аллаһ Үз рәхмәтенә теләгәнне кертсен өчен... Әгәр алар аерылган булсалар, Без, әлбәттә, алардан кәфер булганнарны үзәк өзгеч газап белән газаплар идек!"

26. "Менә кәфер булучылар үз кальб-күңелләрендә котырынуны урнаштырдылар, җаһилиять котырынуын, һәм Аллаһ Үз рәсүле белән иман китереп инанучыларга күңел тынычлыгын иңдерде, һәм аларга тәкъвалык сүзен аерылмас итеп куйды. Алар аңа хаклы һәм лаеклы иде. Һәм Аллаһ барлык нәрсәне белә!"

27. "Аллаһ Үз рәсүленең төшен хаклык белән раслады. «Әгәр Аллаһ теләсә, сез, әлбәттә, изге мәчеткә иминлектә, чәчләрегезне кырып һәм кыскартып, курыкмыйча керерсез. Ул сез белмәгәнне белде һәм моннан башка якын җиңүне дә булдырды."

28. Ул — туры юлны күрсәтүче җитәкчелек һәм хаклык дине белән — ул һәр диннән дә өстен булсын өчен— Үзенең рәсүлен җибәрде. Ьәм Аллаһның шаһит булуы җитә төшкән!

29. "Мухәммәд — Аллаһның рәсүле. Аның белән бергә булучылар кәферләргә карата гайрәтлеләр һәм үзара рәхимлеләр. Син аларның Аллаһтан юмартлык һәм ризалык теләп тезләнгәннәрен, сәҗдә кылганнарын күрәсең. Аларның билгеләре — битләрендә сәҗдә кылу эзе. Тәүратта аларның сыйфатлары менә шул һәм Инҗилдә аларның сыйфатлары нәкъ игенлек кебек, ул үрентесен чыгарган һәм аны ныгыткан. Һәм ул нык булды, һәм кәферләрне ачуландырыр өчен игенчеләрне сокландырып сабагында күтәрелде. Аларның араларыннан иман китереп инанучыларга һәм игелекле эшләр эшләгәннәргә Аллаһ ярлыкау һәм бөек әҗер вәгъдә итте!"