Anteri dhe Kanguri

Kur Anteri mësoi nga një libër se, kangurët i rrisin të vegjlit e tyre në xhepa të veçantë në barkun e tyre, pyeti veten i çuditur: "A kanë me të vërtetë kafshët xhepa?" Kanguri në libër, befas filloi të kërcente nëpër faqe dhe iu përgjigj: "Ke të drejtë të habitesh Anter. Po, ne, kangurët me të vërtetë kemi një xhep në bark dhe pikërisht këtu i ushqejmë, i mbrojmë dhe i rrisim të vegjlit tanë."

Anteri iu afrua për të vështruar më mirë dhe i zunë sytë një kangur të vogël që kishte nxjerrë kokën nga xhepi i nënës së tij në pikturë.

"Dua të di se si ka hyrë i vogli në xhep," e pyeti ai nënën kangur, e cila iu përgjigj:"Kur lind një bebe kangur është vetëm 1 centimetër i gjatë. Kjo bebe e vogël, e cila është ende e pazhvilluar, mbërrin në xhep pas një udhëtimi prej 3 minutash."

"Oh, po kjo qenka shumë e habitshme!" ra në mendime Anteri. E si e ushqen atë ti atje?"

Nëna i shpjegoi me durim: "Në xhepin tim ka 4 gjendra të ndryshme qumështi. Në njërën nga këto gjendra, ka qumësht të ngrohtë, gati për të ushqyer të voglin. Në tri gjendrat e tjera gjendet qumështi, i cili nuk është për të porsalindurin, por për kangurët e tjerë që janë pak më të mëdhenj. Pas disa javësh, i porsalinduri do ta lerë gjendrën nga e cila është ushqyer që në fillim dhe do të fillojë të ushqehet nga një tjetër, më e përshtatshme për moshën e tij. Kur të rritet edhe pak, do të kalojë përsëri tek një tjetër."

"Oh, e pabesueshme!" ia priti Anteri i ngazëllyer. "Si e di një bebe kangur që është vetëm 1 cm i gjatë se nga cila gjendër ta zgjedhë qumështin? Po ti, si nënë, si ia bën për të vendosur lloje të ndryshme qumështi në ato 4 gjendra?

Nëna kangur vazhdoi t'i sqaronte: "Qumështi që ushqen të porsalindurin është më i ngrohtë se llojet e tjera. Po ashtu, edhe përbërësit ushqyes i ka të ndryshëm. Si mendon se ne, nënat kangur e ngrohim qumështin që ndodhet në gjendra? Mos harro, i dashur Anter, se nuk janë nënat ato që e bëjnë gjithë këtë. Ne as nuk e dimë se qumështi në gjendrat tona është i ndryshëm në secilën prej tyre. Për ne nuk është e mundur të llogarritim temperaturën e tij. Po ashtu, ne nuk dimë se secili prej llojeve të qumështit ka cilësi të ndryshme dhe as se çfarë lloj ushqimi përmban ai. Ne vetëm sa jetojmë ashtu siç na frymëzon Allahu, i Cili na ka krijuar dhe ka parashikuar nevojat e të vegjëlve tanë. Zoti ynë, me mëshirën e Tij të pamatë, dhe dhembshurinë e Tij u ka dhënë të vegjëlve tanë qumësht të përshatshëm për ta dhe i ka vendosur në vendin më të mirë, në xhepat e nënave të tyre."