Pamekasan

Samanaya, a pembatiyaen ka ini na kena ba seka bo i matatago sa kwarto. Apiya sii ko manga oras a aya a panarima kaon na matatanggisa ka, na aya mataan, na da den a masa o ba seka na matatanggisa. So manga sosogoon o Allah a manga malaikat na tatap a kaphagilaya iran reka ago tatap a kiphesoraten iran ko langon-taman a penggolawlaen ka. Giyai den i kapakatharo ka sa isa bo a basa na minisorat iran den gagaan. So oman i lakad ka, oman i mititik ko pamikiran ka, langowan-taman a penggolawla-en ka, taman ko manga galebek a miyasendod, na palaya den aya misosorat, sa da a baon khalebat.

Giyaya a manga malaikat na di iran pakaphesesenggayaen so maito ago mala a manga galebek. Apiya sii ko katotoroga reka na lalayon ka siran maaped. Totordoon iran so manga galebek iran sa da a baon kharibat. Di siran khalipat o di na kharibat; tanto a tarotop so kapenggalebeka iran ko manga galebek iran. Sa lagid anan mambo, na so tindo reka a manga malaikat o kapatay na phamagayan. Tatap a kaphamagayani iran reka. Antonaa i penayawn iran? Giyoto so kaphakatalingoma o oras ka. Amay ka makatalingoma so tiyakdir reka a oras a kaphatay ka, na siran so pendolog ko niyawang ka.

Ped saya, na aden a manga saksi a da tano pen maaloy, siran so di ka mapipikir, siran so manga sikrito a saksi ka: so manga limang ka, kobal, pamamakinegan ago pangilaylayn. Sii ko Gawii a Kapangokom, na langon anan a manga saksi na khatimo-timo, na sii ko idin o Allah na palaya siran pethataro ago phanonothol mipantag reka. Opama ka isa ka a tao a da kalek iyan ko Allah, o di na isa ka a tao a da a sanggila iyan, na pesaksi-an ka iran.

Inaden so manosia ka aden iran masimba so Allah, ago tatap so kapetepengi kiran. So kalayat a kawyag-oyag o manosia na aya kalilid a kakempet iyan na sii ko manga nempolo ragon, kena ba ini malayat a oras ko kapagendod iyan ko hadapan o Allah ka aden mapamagitong so oman i inek o kawyag-oyag iyan. Amay ka katokawan o oman i isa o antonaa i miyaporon iyan sa donya a phamakarayagen a giyaya a manga saksi, na so Allah na khokomen Iyan o antonaa i paras a midadaiton a tatap a kawyag-oyag. Opama ka aya matatangan o tao na manga-pipiya a amal, na imbegay rekaniyan so Kitab iyan sa kawanan a lima, ago giyoto den i kiyaparolia niyan ko tatap a kapakalidas. Ogaid na opama peman ka ped sekaniyan ko aya khikawa iran ko manga Kitab iran na diwang a lima, na aya mapetharo iran:

“… Hay! o ba raken bo da mibegay so Kitab aken! Ago di aken katawan o antonaa i itongan raken! o bo o giyoto (a kapatay) na miyabaloy den a kaposan aken! Da a minilinding raken o tamok aken! Miyada raken so bager aken!” (Surat al-Haqqa: 69:25-29)

Samananan, na gaposen sekaniyan ago taros a tondaen a ba den makatotolong ago pakaphanarosen sa Naraka, na roo, na di sekaniyanon den makaliyo.

Aya sabap a giyaya a pakalek-lek a khaoriyanan na so manga tao na da iran den mapikir o ba so oman i zowaen iran na ipindaptar, na sa akhir a gawii na phamakarayagenon ago phamagitongenon. Sabap roo, na pephakalepasen iran so kawyag-oyag iran sa da a kapananggila ago di iran ipekhalek so Allah o di na so manga tapaos Iyan. So tao a lagid aya a da a miyatangked a paratiyaya niyan ko Mawri-Alongan, o di na sii ko Gawii a Kapangokom, o di na sii ko Naraka a darpa a piyakalek-lek -a roo pembadalan so marata a amal ago so da sanggila a paparangayan,- na di iran den phamikiren o ba iran kiyarimpasi so manga tamana a inigoris o Allah.

Giyaya i sabap a so kalek ko Allah na aya titho a mala a takes ko paratiyaya ko Allah, ago aya lebi a toos o antonaa i khaparoli sa Mawri-Alongan. Aya bo a matatangked a kapakalidas na so phapasod ko inengka ko Allah a sartaon so kalek Rekaniyan ago so titho a kapananggila.

So Gawii a Kapangokom na piyakalek-lek a kabenaran, a patot a maphamimikiran a sartaon so kalek ka aden magedam phiya-piya ago di mada sa ginawa. Ogaid, na giyaya a kalek na sii bo aya khatoon ko manga tao a aden a paratiyaya niyan. Sambida aya a kalek sabap sa piyakarayag o Allah sii ko madakel a manga ayat sa Qur’an so khasowa-sowa sii ko Gawii a Kapangokom, sii ko manga panonorat, sii ko manga saksi, ago sii ko pinakamala a kapelimo-limod o manga manosia. Giyaya i matatangked a mataan a tiyarima ago piyaratiyaya o manga titho a miyamaratiyaya; a tanto iran a ika-aalek so kaphakaadap iran sa giyanan a pakalek-lek a karomasayan.

So langon a sowaen ka na taros a ipesorat o manga malaikat, taman sa kapembatiyaa ka sa kitab aya. Di den kadthi na phakatalingoma reka so gawii a thawagen ka o Allah ka isomarya reka so manga galebek ka. Sabap san na panginamen tano a maped tano ko siranoto a miyakowa iran so ikasosoat o Allah mokit ko kiyainengkaa iran Rekaniyan:

“… Na peloto kano; na mataan! a aya mapiya a loto na so kalek ko Allah. Ago kaleken Ako niyo, hay aden a manga sabot iyan!” (Sura al-Baqara: 2:197)