Cem ilə Rəngli Kəpənəklər

Cem həftə sonu tətilində babasıgilə getmişdi. İki gün çox tez keçmiş və atası onu almaq üçün gəlmişdi. Cem çoxdan babasıyla vidalaşıb, avtomobilin oturacağında əyləşmişdi. Atasının əşyaları daşımasını gözləyərkən, şüşədən çölü seyr edirdi. Bir az qabaqdakı çiçəyin üstündən bir kəpənək qanadlandı və avtomobilin şüşəsinə qondu.

Kəpənək: Deməli, artıq evinə qayıdırsan, eləmi Cem?

Cem: Sən məni tanıyırsanmı?

Kəpənək: Əlbəttə ki, tanıyıram. Babanın qonşularına səni tanıtdığını eşitmişdim.

Cem: Niyə daha əvvəl yanıma gəlmədin.

Kəpənək: Gələ bilmədim, çünki mən bağçadakı ağacın üstündə bir baramanın içindəydim.

Cem: Baramamı? O da nədir?

Kəpənək: Biz kəpənəklər yumurtadan kiçik bir tırtıl kimi çıxarıq. Yarpaqları gəmirərək qidalanarıq. Sonra bədənimizdən ifraz olunan bir mayedən iplik kimi istifadə edərək ətrafımıza çəpər çəkərik. Hördüyümüz bu paketə “barama” deyilir. O paketin içində bir müddət böyümək üçün gözləyirik. Oyanıb baramadan çıxdıqda artıq rəngli qanadlarımız olar. Həyatımızın bundan sonrakı hissəsini uçmaqla və çiçək tozlarıyla qidalanmaqla keçirərik.

Cem: Yəni, bütün o rəngli kəpənəklər balaca olduqları vaxt qanadı belə olmayan bir tırtıl idimi?

Kəpənək: Bu budağın üstündəki yaşıl tırtılı görürsənmi?

Cem: Bəli gördüm, iştahla bir yarpaq gəmirir.

Kəpənək: Məhz o mənim kiçik qardaşımdır. Bir müddət sonra o da baramasını hörəcək və bir gün mənim kimi kəpənək olacaq.

Cem: Bu dəyişməni necə planlaşdırırsınız? Yəni, yumurtadan nə vaxt çıxacağınızı, nə qədər müddət tırtıl olaraq qalacağınızı, baramanı hörmək üçün ipliyi necə hazırlayacağınızı?

Kəpənək: Bunların heç birini biz planlaşdırmırıq. Allah nəyi, nə vaxt etməyimizin lazım olduğunu bizə öyrətmişdir. Biz də ancaq Rəbbimizin dilədiyi şəkildə hərəkət edirik.

Cem: Üstəlik çox gözəl naxışlarınız var. Heç bir kəpənəyin naxışı, başqa birinə bənzəmir. Rəngarəng və göz oxşayandır.

Kəpənək: Bu da Allahın bənzərsiz sənətinin bir dəlilidir. Hər birimizi ayrı-ayrılıqda, ən gözəl şəkildə yaratmışdır.

Cem: Allahın yaratdığı gözəllikləri görməmək qeyri-mümkündür. Ətrafımız sonsuz nümunələrlə doludur.

Kəpənək: Haqlısan Cem, bunun üçün Allahı çox uca tutmalıyıq.

Cem: Atam gəlir, yola düşəcəyik. Tanış olduğumuza sevindim, həftəyə gəldiyimdə yenə danışaq olarmı?

Kəpənək: Əlbəttə ki, olar uğurlu səyahətlər.